NIA-in Yasin Malik-a thi tura hremna pek duh

National Investigation Agency (NIA) chuan Kashmir hel hruaitu hlui, firfiakte ṭanpuina sum pe ṭhina puh Yasin Malik chu Unlawful Activities (Prevention) Act hnuaia thiam loh chantir tawh chu hremna na ber, thi tura hremna pek ngei an phut.

NIA hian Malik hremna pek an duh dan hi nimin khan special judge Praveen Singh hnenah an thehlut a ni. Hetih lai hian Malik-a ukilte chuan dam chhung tantir turin an ngen thung.

May 19 khan court chuan Malik hi thiam loh a chantir a, NIA thuneitute nena sum eng zat nge chawi tir a nih dan tur ngaihtuah a nih theihna atan a sum dinhmunte enfiah turin a ti a ni.

Hetih lai hian Malik chuan kum 1994 khan helna a bansan a, hemi hnu hian Mahatma Gandhi zirtirna chu a zawm zui tih sawiin, "Hemi aṭang hian Kashmir-ah tharum tel lo politics chauh ka buaipui tawh a ni," a ti. Prime Minister pasarih-te a lo thawhpui hman tawh tih sawiin, intelligence agency hnenah hian kum 28 liam ta chhung khan firfiaka chetna emaw, tharum thawhna lam hawia a telna an hriat chu sawichhuak turin a ti. Sawichhuah tur an hriat chuan politics a chawlhsan ang a, court-in thi tura hremna a pek pawhin a pawm thlap ang tih a sawi bawk.