Kapil Sibal-a'n Congress party chhuahsan

Union minister hlui leh Congress party hruaitu hlun zinga mi, Kapil Sibal chuan nimin khan Congress aṭanga a ban thu sawiin, Rajya Sabha inthlan awm turah Samajwadi Party thlawpin independent candidate angin nomination paper a thehlut nghal.

Kapil Sibal chuan, "May 16 khan Congress party aṭangin ka bang a ni," a ti a, mahse Congress hian kar liam ta khan programme pawimawh tak, Chintan Shivir' an hman avangin a ban thu hi thup a ni rih a ni, a ti.

Nimina Uttar Pradesh-a Rajya Sabha inthlan neihna tura nomination paper a thehluh hnua chanchinthar lakhawmtute a kawmnaah, Congress party hruaitu anih tawh loh thu hi a sawichhuak ta chauh a ni.

Congress party aṭang hian thla nga chhunga hruaitu lawk panga an chhuahna a ni. Lawyer lar tak, Sibal hi Congress hruaitu hlun ber zinga mi a ni. Kum hnih liam ta khan party president Sonia Gandhi hnenah an party hruaitu leh kalphung chu thlak danglam a ṭul thu ziakin a lo thlen tawh a, Gandhi chhungkua, a bikin Rahul Gandhi pawh a lo sawisel fo tawh bawk.

Sibal-a Rajya Sabha member term hi kumin July thlaah a tawp dawn a ni. Uttar Pradesh-ah hian thla tharah Rajya Sabha seat 11-ah inthlan neih a ni dawn a, Sibal hian inthlana chuh tum hian nimin khan nomination paper hi a thehlut a, he hunah hian Samajwadi Party hotu Akhilesh Yadav chuan a ṭawiawm a, SP-in Rajya Sabha inthlan neih tur atana an mi thlan hmasa ber a nih thu Yadav chuan a sawi.