Kum 2020-a mitthi zinga 8.9%-te Covid-19 vanga thi

Registrar General of India (RGI) office-in Nilainia Report on Medical Certification of Cause of Death-2020 a tihchhuahah, kum 2020 chhunga ram puma mitthi zat chhinchhiah, nuai 18.11 zinga 1,60,618 chu Covid-19 hri vanga thi an ni a, hei hi mitthi zat aṭanga 8.9% an tling.

Kum 2020-a mitthi leh an thihna chhan chhinchhiah zingah Covid-19 hi thihna thlentu tam lamah a palina a ni a, hetih lai hian state pasarihah erawh chuan Covid-19 hri hi thihna thlentu tam ber dawttu a ni thung.

Maharashtra-ah kum 2020 chhunga mitthi zinga 17.7% chu Covid-19 vanga thi an ni a, Manipur-ah 15.7%, Uttar Pradesh-ah 15%, Himachal Pradesh-ah 13.5%, Andhra Pradesh-ah 12%, Punjab-ah 11.9% leh Jharkhand-ah Covid-19 hri thihpui hi 7.6% an awm a ni.

RGI report-in Covid-19 vanga thi, medically certified a tarlan, 1,60,618 hi Union Health Ministry-in official-a kum 2020-a Covid-19 hri vanga thi a tarlan, 1,48,994 aiin a tam zawk. Health ministry data chuan India ramah hri len tirh aṭanga May 25,2022 thleng khan Covid vanga thi hi 5,24,507 niin a tarlang.

Report on Medical Certification of Cause of Death-2020 siamna atan hian Covid-19 vanga thi data lakhawm turin group hran siam tel a ni. Report-ah hian Covid vanga thite hi sub-head pahnihah dah an ni a, pakhatah chuan laboratory test-ah Covid-19 hri kai an ni ngei tih finfiahte dah niin, a dang pakhatah chuan laboratory-ah hri an kai tih finfiah kher lo tihte an ni.

Covid-19 hri vanga thi chhinchhiah zinga 1,38,713 chu hri kai tih finfiah niin, mi dang 21,905 chu finfiah loh an ni thung.