Registered Unrecognised Political Party-te lakah action la dawn

Election Commission of India (ECI) chuan Representation of the People (RP) Act hnuaia zawm tura tihte an zawm loh avangin Registered Unrecognised Political Party (RUPP) 2,100 chuang chungah action a la dawn.

ECI chuan Nilaini khan RUPP enfiahna an neihnaah, heng zinga party 87 chu an ding chhunzawm tawh lo tih hriat a nih thu pawh a sawi. List aṭangin paih an ni ang a, Symbols Order (1968) hnuaia hlawkna an neihte pawh tihtawp vek a ni ang.

Commission chuan RUPP list-a ziah luh zinga 92% chuangin kum 2019-a contribution report an thehlut lo tih a sawi. Party zinga 623 chauh hian 2019 Lok Sabha inthlanpuiah an chuh bawk. Assam, Kerala, West Bengal, Tamil Nadu leh Puducherry-a hmunpui nei, kum 2021 assembly inthlana chuh party 11 5 zingah party 15 chauhin inthlan atana an sum hman dan, expenditure statement an thehlut tih a sawi bawk. Expenditure statement hi Assembly inthlan neih aṭanga ni 75 chhung leh, Lok Sabha inthlanpui neih aṭanga ni 90 chhunga thehluh tur a ni.

Kum 2021, September thla thleng khan RUPP hi 2,796 ziah luh a ni a, kum 2001 aia an punna hi 300% chuang a tling. Commission chuan registered party-te chu RP Act Section 29 C an zawm vek tur a ni a, contribution report an thehlut ṭhin tur a ni, a ti. Contribution report thehluhte chu income tax 100% awltir niin, hei hi an party thuam chakna atana incentive anga pek an ni.