Delhi Lt Governor atan Vinai Kumar Saxena lalut

Vinai Kumar Saxena chu nimin khan Delhi Lieutenant 22-na atan rinawmna thu tiamtira lakluh a ni.

Kum 64 mi, Lt Governor thar hi Delhi High Court-a acting chief justice Vipin Sanghi chuan Raj Niwas-ah rinawmna thu a tiam tir a ni. He hun hi Delhi chief minister Arvind Kejriwal leh a cabinet minister te, union minister Giriraj Singh, Delhi MP leh MLA-te sorkar official-ten an telpui.

Lakluh a nih hnuah chanchinthar lakhawmtute a kawmnaah, Delhi LG chuan mipuite enkawltu, vengtu tur a nih thu a sawi. Delhi khawpuiin pollution chungchangah harsatna lian tak a tawh chu sorkar laipui, Delhi sorkar leh tualchhung mipuite nen chinfel dan ngaihtuahin theihtawp an chhuah dawn tih a sawi.

May 18 khan Anil Baijal chu mimal thil vang nia sawiin Delhi LG a nihna aṭangin a bang a, May 23 khan a thlaktu atan Saxena hi ruat a ni. Delhi LG atana ruat a nih hma hian Saxena hi Khadi and Village Industries Commission (KVIC) chairperson a ni.