Darkar 24 chhungin Covid-19 kai enkawl dam 10,994 awm

India ramah Covid-19 hripui lengin ziaawm lam a pan thei lo a, nimina Ministry of Health and family Welfare report tihchhuahah chuan hri kai hmuh chhuah thar 14,933 an awm, hetih lai hian enkawl dam thar pawh 10,994 lai an awm ve bawk.

Ram pumah hri kai 4,40,215 an awm tawh a, enkawl dam 2,48,190 awm tawhin hri kai mek 1,78,014 an awm a ni. Darkar 24 chhungin mi 312 lai an thi leh a, hri len ṭan tirh aṭang khan India ramah Covid-19 vangin mi 14,011 an thi tawh a ni.

Enkawl dam tawh rate pawh sang ve zelin 56.37% a ni tawh a, hetihlai hian thihpui rate chu 3.18% a ni tawh.

Indian Council of Medical Research (ICMR) chuan ni khatah Covid-19 sample 1,87,233 an test tawh a, hri len ṭantirh aṭanga nimin thleng khan sample 71,37,716 an test tawh a ni. 

ICMR hian Covid-19 sample test theihna tur laboratory pawmpui 992 an nei tawh a, heng zinga 726 chu sorkar laboratory a nih laiin 266 chu private laboratory a ni thung.

Sorkar laipuiin PM CARES fund hmanga ram chhung ngeia siam, ventilator 50,000 a sanction aṭanga 3,000 dawn chu siam zawh a ni tawh a, heng zinga 1,340 chu state ṭhenkhat hnenah pek a ni. 

May 14 khan PM CARES Fund Trust chuan Covid-19 hripui leng mekah mamawh leina turin cheng vaibelchhe 3,100 a dah a, heng zinga cheng vaibelchhe 2,000 chu India rama siam, ventilator 50,000 leina turin ruahman a ni. Hei hi hri kaite enkawlna damdawiina sem tura tih a ni. 

Nimina official thuchhuah siamah, ventilator hi 2,923 siam zawh ni tawhin, heng zinga 1,340 chu state/UT hnenah sem chhuah an ni tawh a ni, a ti. Hengte hi Maharashtra-ah 275, Delhi-ah 275, Gujarat-ah 175, Bihar 100, Karnataka 90 leh Rajasthan-ah 75 pek an ni.  Tun thla tawp lamah ventilator 14,000 dang sem leh a ni dawn a, state leh UT tin hnenah pek vek tum a ni bawk. 

Ventilator 50,000 zinga 30,000 hi Bharat Electronics Ltd in a siam dawn a, AgVa Healthcare-in 10,000, AMTZ Basic-in 5650, AMTZ High End-in 4000 leh Allied Medical-in 350 an siam 

bawk ang. 

Yoga Guru Baba Ramdev Patanjali Ayurved chuan Covid-19 enkawlna tur nia sawi Ayurvedic damdawi Coronil nimin khan an tlangzarh.

Baba Ramdev chuan an damdawi tlangzarh thar an enchhinnaah Covid-19 kai 69% chu ni thum chhungin an dam leh tih sawiin, an enchhinna damlo zawng zawngte chu kar khat chhungin an dam leh vek niin a sawi.