Inbengdaih remti

Ladakh khawchhak lam, Gawan Valley-a India leh China sipaite intihbuaina a thlen hnuah, ram pahnih aiawhte hian inremna a awm theihna atan inbiakna an nei zui nghal a, Corps Commander level inbiakna neihah boruak ṭha a awm theihna atan inbengdaih an remti. 

Thawhṭannia Moldo, China-a inbiakna neihah hian India lam aiawhin XIV Corps Commander Lt General Harinder Singh a tel a, China lam aiawhin South Xinjiang region-a People's Liberation Army commander Major General Lin Liu a tel. Inbiakna hi boruak ṭha tak hnuaiah an nei nia sawi a ni bawk. 

Galwan Valley-a ram pahnih sipaite intihbuai­naah hian India sipai 20 an thi a, mi dang eng emaw zatin hliam an tuar. Buaina chhuak hi kum 1967 hnu lamah India leh China sipaite inkara intihbuaina thleng nasa ber nia sawi a ni. 

Buaina chhuakah hian China lam sipai 40 vel an thi niin report ṭhenkhat chuan a tarlang a, mahse hei hi thu dik lo a nih thu China foreign ministry thupuangtu Zhao Lijian chuan a sawi.