DU zirlaiten ABVP duh lohna kawng zawh huaihawt

Delhi University-a zirlai leh zirtirtute chuan BJP nena inzawm, Akhil Bharatiya Vidyarthi Parishad (ABVP) in university campus chhunga zirlai leh zirtirtute kut an thlak duh lohna lantirin nimin khan ‘Save DU’ kawngzawh an huaihawt.

Kawngzawh hi Left Front hnuaia zirlai pawl, All India Students Association huaihawt a ni a, Khalsa College pawn lamah pungkhawmin, ABVP leh Delhi Police-te chunga an lungawi lohna thute an aupui.

Zirlai lungawi lo pung­khawm­te chuan February 21 leh 22 khan Jawaharlal Nehru University zirlai Umar Khalid-a thu sawi tura an sawm avangin Ramjas College zirlai leh zirtirtute chu ABVP member-ten kut an thlak niin an sawi. Khalid hi nikuma JNU campus-a Afzal Guru-a thlawptute hun buatsaihah India dodal zawnga thu sawia puh a ni a, thubuai pawh siamak a ni.

Congress zirlai pawl, National Students Union of India president Amrita Dhawan chuan Ramjas College-a thil thleng chu pawi an tih thu a sawi a, college campus-a ABVP-ten tharum thawhna an thlentir avang hian zirlai tam tak hlau hlawpin an awm phah a ni, a ti. Tharum thawhna thleng chu eng kawng maha pawm theih a ni lo tiin, democracy ramah chuan mi hrang hrangin ngaihdan hrang an neihte an puangchhuak thei a, hei hi tharum hmanga beih let tur a ni lo, a ti.

Kargil martar fanu, Gurmehar Kaur (22), Delhi University zirlai chuan ABVP duh lohna lantirin Facebook campaign a nei mek bawk. Gaur-i hian Ramjas College-a tharum thawhna an thlen avangin ABVP chu a hlauh phah lo tih thu ziahna thlalaktte a thehdarh a, a campaign hi university hrang hrang zirlai zingah thlawptu a ngah hle a, mahse BJP hruaitu leh MP ṭhenkhatte chuan an sawisel thung. Kaur-i hian Facebook campaign a neih vang hian ABVP member ṭhenkhat hnen aṭangin pawngsuala vauna lehkha a dawng a, hei vang hian nimin khan police station-ah FIR thehluh a ni.

Eptu party, Congress chuan BJP kaihhruai NDA sorkarin Kargil martar fanu chungchang an beihna chu na takin a sawisel. Congress vice-president Rahul Gandhi chaun Kaur-i thlavang hi hauhin an thlawp tlat thu a sawi.

Punjab Chief Minister hlui Amarinder Singh pawhin ABVP chu sawiselin, dan pawna hnawl turin sorkar a phut. ABVP member ṭhenkhatin Kaur-i an vau chu thil zahthlak tak a nih thu a sawi a, Kaur-i pa chuan ram tan a nun a hlan a, hetihlai hian a fanu chuan dan anga taka thil a kalpui chungin beih a tawk mek a ni, a ti. Ramjas College campus-a tharum thawhna thlentu, ABVP member-te chunga action an lak duh loh avangin Delhi Police-te a dem thu Singh chuan a sawi bawk a, pawikhawihtute chu man ngei turin a phut.