Question paper putruk chungchang Col chhui turin ti
Defence ministry-in army recruitment examination a buatsaiha exam zawhna putruk chungchang chu sipai chhunga Court of Inquiry (Col)-in a chhui turin Army chuan nimin khan thupek a tichhuak.
Sipai lakna tur exam buatsaiha zawhna a putruk chungchangah Pathianni khan Thane police-te chuan he thila inhnamhnawiha puh mi 18 an man a, candidate 300 chuang thu zawhfiah an ni tawh bawk. Pune Zone pumah exam tur hi cancel a ni bawk.
Court of Inquiry hi major-general a ho dawn a, panel-ah brigadier pahnih an awm bawk ang. Col chhuitirna tur hi question paper putruk chungchang New Delhi-a Army headquarters hriattir a nih hnua Southern Army Command thupek tihchhuah a ni. Zawhna putruk chungchangah hian sipai ṭanglaite inrawlh an awm a nih chuan na taka hrem an nih tur thu a tarlang.
Military Intellingence Corps officer hlui, retd. Brigadier PT Monappa chuan he thil thlengah hian Army headquarters lama mi tu emaw inrawlh an awm ngei a rin thu a sawi. Chhim lamah Deputy Director General for Recruitment a nih laiin hetiang thil hi a lo thleng tawh a, CBI kutah a hlan niin a sawi a, sipai chhung aṭanga chhui tir ngawt chu a ṭha ber lo nia ngaih thu a sawi. Paper putruk vanga candidate te mawhpuh a, man an ni chu awmze nei lo niin a sawi bawk.