AIADMK MP-in Jaya-i thih dan chhui a phut

Tamil Nadu-a rorellai, AIADMK MP V Maitreyan-a chuan President Pranab Mukherjee-a hmuin, Tamil Nadu chief minister hlui J Jayalalithaa-i thih dan chhuitir turin a ngen.

Rashtrapati Bhavan-a President a hmuh hnua chanchin thar lakhawmtute a kawmnaah, Maitreyan chuan Amma (Jaya) hi Apollo Hospital-a dah luh a nih hnu khan mipuite hnenah khawsik vang a nih thu leh, natna dang a neih loh thu sawi a ni a, mahse hospital-ah hian ni 75 chhung zet enkawl a ni zui ta a ni, a ti.

Tamil Nadu sorkar chuan Jaya-i thih dan chhui tura an ngenna chu a pawmsak an rin loh avangin President hnenah hian thlenin, memorandum an thehluh niin Maitreyan chuan a sawi.

Jaya-i hi damdawi-inah ni 75 chhung enkawl a nih hnuin nikum December 5 khan a thi a ni. A enkawltu doctor pakhat, London-a mi specialist Richard Beale-a chuan Jaya-i thih danah hian inphiarrukna leh thil dik lo a awm lo niin a lo sawi tawh a ni.