Covid-19 kaite enkawlna tur Remdesivir leh Favipiravir

Pharmaceutical company ten Covid-19 hri kai enkawlna tur atana damdawi an siam, Remdesivir leh Favipiravir chuan hma sawnna a thlen ngei an rin thu damdawi lama mithiamte chuan an sawi.

Glenmark Pharmaceutical company chuan FabiFlu tiin antiviral drug, Favipiravir an siam chu an tichhuak tawh a ni.  He damdawi hi Covid-19 hri kai,  dinhmun ngaihtuahawm lutuk lote enkawlna tura tih a ni a,  tablet pakhat hi Rs.103 man a ni.

Drug Controller General of India (DCGI)-in phalna a pek hnuah Cipla Ltd company leh Hetero Labs  chuan Cipremi leh Covifor tih hmingin Remdesivir  hi an siam bawk. 

AIIMS damdawi-ina Centre for Community Medicine, professor Dr Sanjay Rai chuan hri kaite enkawlna tur damdawi a awm ṭan thu sawiin, mahse a tihdamna tur damdawi erawh hmuhchhuah a la nih loh thu a sawi. Shalimar Bagh venga Fortis Hospital-a Department of Pulmonology and Sleep Disorders director, Dr Vikas Maurya chuan Covid-19 kaite tihdamna tur damdawi a la awm loh avangin hri kaite enkawlna tur atan Remdesivir leh Favipiravir chu hman tum a nih thu a sawi a, heng damdawi hian hri kaite enkawlna lamah doctor-te a puih ngei a beisei thu a sawi.