Guwahati hmun ṭhenkhatah Total lockdown puang

Assam-ah Covid-19 kai an pun belh zel avangin nizan dar 6 aṭang khan Guwahati khawpuia hmun eng emaw zatah ni 14 chhung atan total lockdown puan a ni. 

Health minister Himanta Biswa Sarma chuan June 15 aṭang khan Guwahati khawpui chhunga hri kai hmuh chhuah zinga 144 chu hmun danga zin chhuahna nei lo an ni tih a sawi a, hei vang hian hri leng hi mipuia a darh tur venna atan total lockdown hi kalpui a ngai tih a sawi. Thawhṭannia hri kai hmuh chhuah zingah BJP MLA Krishendu Pal pawh a tel. MLA hian hmun danga zin chhuahna a nei lo a, tualchhung aṭangin he hri hi a kai a ni. A chenna in chu containment zone-ah puang nghal niin,a  chhungte swab sample pawh lak sak an ni tawh bawk. 

Assam-ah nimin khan hri kai thar hmuh chhuah hi mi 267 an awm belh leh a, heng mite nen hri kai hmuh tawh hi mi 5,853 an tling tawh a ni. 

Guwahati khawpuiah hian Targeted Surveillance Programme hnuaiah test runpui hi neih mek a ni a, sample test-na tur siamah nitin mi 400-500 vel an kal niin Health Minister chuan a sawi.