Kashmir-ah zirlai chhunzawm
Kashmir Valley-a firfiak Burhan Wani thah a nih avanga hun rei tak tualchhung buaina thlengin zirna-in hrang hrangte a nghawng buai hnuah, nimin aṭang khan zirlaite chuan zirlai an chhunzawm leh thei ta.
Tualchhung buaina thleng vang hian mi 100 chuangin nunna an chan a, school leh college zirlaite chuan thla riat vel zet zirna an chhunzawm thei lo a ni.
Security force-te’n Burhan Wani an thah avang hian Valley hmun hrang hrangah lungawi lohna lan tir a ni a, nawrh huaihawtte leh police-te inkara buaina chhuak vangin mi tam takin hliam an tuar a, police-te pellet kahchhuah avangin mi 700 chuang zet chu mit lam ṭha lo leh mitdel phah an awm a ni.
Buaina chhuak hian ziaawm lam a pan tawh a, mahse hmun ṭhenkhat, a bikin Kashmir chhim lamah chuan buaina a la chhuak fo a ni.
School education official-te chuan zirlai an chhunzawm leh thei chu lawmawm an tih thu sawiin, kuminah chuan zirlai tibahlah zawnga buaina a thlen tawh loh an beisei thu an sawi. Hun rei tak school te khar ni mah se, Class 10 leh 12th board exam bakah, competitive exam dang pawh buatsaih tho a ni.
Nikuma tualchhung buaina a chhuah chhung khan Kashmir Valley-a sorkar school building 30 dawn chu halral an ni.