BJP MP-in Muslim-te ruang halral turin duh

BJP MP Sakshi Maharaj chuan Muslim sakhaw zuituten mitthi ruang an phum ṭhin chuan ram a tihhek avangin, Muslim thite ruang chu phum tawh lo a, halral zel zawk tura a duh thu a sawi.

Maharaj chuan Unnao-a vantlang inkhawma thu a sawinaah,”Thlanmuala inphum kher hi a ngai lo. India ramah Hindu puithiam, an thih hnua an puala hriatrengna siam hi mi vaibelchhe 2 - 2.5 vel an awm a ni. Heng mite hi phum ve vek nise ram zau tak a ngai dawn a ni. Muslim hi vaibelchhe 20 vel an awm mek a, heng mite hian an thih hnuah an ruang phumna tur ram an mamawh vek dawn a, ram ruak a awm thei tawh dawn lo a ni?” a ti. Saskshi Maharaj hian a hma pawhin inhnialna chawk chhuak thei thu a lo sawi fo tawh a ni.

BJP MP thusawi hi Cogress party chuan a chhang leh nghal a, Maharaj-a thusawi chuan sakhaw thila inhnialna a chawk chhuak thei a ni, a ti. Congress hruaitu Sandeep Dikshit chuan sakhaw tinin tihdan phung an nei vek tih sawiin, insawisel sak ngawt theih a nih loh thu a sawi.

Samajwadi Party hruaitu Naresh Agarwal pawhin Sakshi Maharaj-a thusawi chuan Hindu leh Muslim inkarah boruak ṭha lo a thlen thei tih a sawi a, BJP ṭhat lohna tarlangtu a ni tiin, buaina chinfelna tur kawng engmah an hre lo a ni, a ti.