A sum lakluh phu loa hausaa puhna thubuaiah Haryana CM hlui kum 4 tang turin hrem a ni

Haryana chief minister hlui, Om Prakash Chautala chu a sum lakluh phu loa hausaa puhna thubuaiah thiam loh chantirin, kum li tang turin hrem a ni.

Delhi-a Rouse Avenue District Court chuan nimin khan Om Prakash Chautala hremna hi puangin a, Rs nuai 50 chawi tur leh, a hmun neih palite pawh laksak turin a ti bawk.

Indian National Lok Dal (INLD) hotu, Chautala lakah hian sum lakluh phu loa hausaa puhna thubuai hi kum 2005 khan siamsak a ni a, kar liamta Inrinni khan court chuan thiam loh a lo chantir tawh a ni.

Thubuai hi kum 2015-ah CBI-in ziaklutin, kum 2010 March 26-ah chargesheet thehluh a ni a, Chautala thil neihte chu Rs vaibelchhe 6.09 hu nia tarlangin, hei hi kum 1993-2006 inkara dan ang taka a sum lakluh nen a inphu lo hle a ni. FIR an ziahluhah, CBI chuan Chautala hi Haryana Chief Minister a nih lai, kum 1999 July 4 - 2005, March 5 chhung khan ama hming leh chhungte hmingin dan ang taka a sum lakluh phu loin thil tam tak a nei niin a tarlang. Hetihlai hian Chautala chuan he puhna hi thu belh chian dawl lo, politics hmanga phuba lak tumna niin an sawi thung.

Kum 2019 khan Enforcement Directorate (ED) chuan Prevention of Money Laundering Act (PMLA) hnuaiah Chautala thil neih, Rs vbc 3.68 hu chu a laksak a, heng zingah hian New Delhi, Panchkula leh Sirsa-a a ram leh flat te a tel.

Chautala hi ṭum li - July 24, 1999 - March 5, 2005; March 22, 1991 - April 6, 1991; July 12, 1990 - July 17, 1990; leh December 2, 1989 - May 22, 1990-te khan Haryana Chief Minister a ni.