Delhi stadium-a infiammi awmte chhuahtirtu IAS officer-te nupa Ladakh leh AP-ah transfer nghal

Delhi stadium-a an ui kalpui an duh avanga infiammi awmte chhuah tirtu nia puh, IAS officer Sanjeev Khirwar chu Ladakh-ah transfer nghal a ni a, a nupui IAS officer vek Rinku Dugga pawh Arunachal Pradesh-ah sawn a ni nghal bawk.

Ministry of Home Affairs (MHA) chuan IAS officer, Delhi-a principal secretary (Revenue) Khirwar-a'n an ui kalpui a duh avanga Delhi-a Thyagraj stadium-a infiammi awmte chu a chhuahtir nia media lamin an report hnu reiloteah hma lain, an nupaa transfer-na order hi a tichhuak nghal a ni.

MHA chuan Delhi chief secretary hnenah media report-a Sanjeev Khirwar leh a nupui Rinku Dugga-ten an thuneihna dik lo taka hmang nia an sawi chu report chiang zawk pe turin a hrilh a, hemi chhunga hian an nupa hi Ladakh leh Arunachal Pradesh-ah transfer phawt an ni. Report azirin a ṭul angin hma lak a ni ang.

Ningani khan stadium leh infiammi leh coach awmte chu ni danga an training hun pangngai aia hma, zan dar 7-ah training titawp tura tih an nih thu infiammite chuan an sawi niin media report chuan an tarlang. Hetih lai hian stadium administrator Ajit Chaudhary chuan infiammite thusawi hi a dik lo niin a sawi thung a, stadium-a an training theih hun hi official pawn zan dar 7 thleng a ni, a ti.

He thil thlen hnu hian Delhi chief minister Arvind Kejriwal chuan Delhi khawpui chhunga stadium-te chu infiammi leh an trainer-te hman turin zan dar 10 thleng hawng ziah turin thupek a tichhuak nghal bawk.