PM CARES for Children hnuaia chhawmdawlna pe chhuak dawn
Prime minister Narendra Modi chuan vawiin hian video-conferencing kaltlangin, PM CARES for Children hnuaia chhawmdawlna a pe chhuak dawn tih ministry of women and child development chuan a sawi.
Sorkar laipui chuan nikum May 29 khan March 11, 2020 - February 28, 2022 inkar chhunga Covid-19 hri vanga nu leh pa, legal guardian, anmahni enkawltuten an thihsan naupangte chhawmdawlna turin PM CARES for Children hi a siam a ni.
Ministry thuchhuah chuan, he chhawmdawlna dawng thei tur naupang, school kal laite hnenah scholarship hi pek an ni dawn a, Ayushman Bharat - Pradhan Mantri Jan Arogya Yojana hnuaiah PM CARES for Children passbook leh health card pawh pek an ni dawn tih a sawi.
Vawiina Prime Minister hun hman tur hi chhawmdawlna dawng tur naupangte leh anmahni enkawltute bakah, disrict magistrate-te chuan virtual mode hmangin an lo zawm ve dawn a ni. Union minister, MP leh MLA-te pawh an tel bawk ang.
He scheme-in a tum ber chu hripui avanga nu leh pa emaw, anmahni enkawltu ber chan naupangte enkawlna ṭha leh, venhimna ṭha tak pek zui a ni. Zirna lam an chhunzawm zelna tur ruahmanna te siamsakin, scholarship pek an ni ang a, kum 23 an tlin thlengin sum hmanga puih an nih bakah, health insurance-te siamsak an ni dawn bawk a ni.