Police-ten J&K-ah drone kap thla

Jammu and Kashmir-a border district, Kathua-ah nimin zing khan police-ten drone an kap thla.

Police-te chuan Talli Hariya area-ah Pakistan ram lam aṭanga rawn thlawk lut, drone hi police search party chuan hmuin an kap thla tih a sawi. He drone-in a thil phurh hi bomb disposal expert-te enfiah tir nghal an ni tih an sawi bawk.

J&K ramri ah hian tun hma lam deuhin drone hi an hmang nasa hle a, hei vang hian sorkar laipui lam pawhin International Border leh Line of Control (LoC)-ah pawh venhin hna thawk turin sipai tam zawk leh hmanrua tam zawk a dah a ni.

Nikum June thla khan ralthuam phur drone chu Jammu-a Indian Air Force station beihna atan hman a ni a, drone hian J&K defence hmunah low-intensity IED pahnih a thlak a ni.