UIDAI -in Aadhaar number pe lo turin mipuite chah Sorkarin UIDAI thuchhuah a sût leh nghal

Unique Identification Authority of India (UIDAI) chuan mipuite chu an Aadhaar photocopy chu eng pawl hnenah mah pe lo turin a chah a, an lo hmansual theih thu a sawi.

UIDAI chuan Aadhaar hman a ngaihnaah pawh masked Aadhaar, Aadhaar number digit tawp lam 4 lanna chauh chu hmang ṭhin turin a ti a, masked Aadhaar hi UIDAI official website, https://myaadhaar.uidai.gov.in ah download theih a ni.

Thuchhuah an siamah UIDAI chuan, e-Aadhaaqr download-na atan internet cafe/kiosk an hmang an nih chuan fimkhur hle tur leh, an download-a computer aṭang chuan e-Aadhaar copy-te chu permanent-a delete vek turin a ti.

"Orgnanisation zingah, UIDAI aṭanga User License neite chauhin mimal identity enna atan Aadhaar an hmang thei a ni. License nei lo private entity - hotel leh film hall-ahte Aadhaar card an lo lak a, a copy an kawl phal a ni lo. Aadhaar Act 2016 hnuaiah pawikhawihna a ni. Hetianga Aadhaar card emaw, a photocopy emaw lo dil an awm chuan, UIDAI aṭangin User License nei an ni em tih enfiah vat ṭhin tur a ni," tiin a sawi.

UIDAI-in organisation-te hnena Aadhaar copy pe lo tura thuchhuah a siam hnuah, sorkar laipui chuan UIDAI thurawn tihchhuah chu a sut leh nghal.

Ministry of Electronics and IT (MeitY) chuan nimin khan UIDAI thuchhuah hian ngaihdan dik lo a siam thei nia sawiin an sut leh nghal tih a sawi. UIDAI hian card holder-te chu Aadhaar number an hman leh pek chhuah chungchangah fimkhur tura a tihna a ni. Aadhaar Identity Authentication ecosystem hian Aadhaar holder-te identity leh privacy hi a venghim ṭha hle a ni, a ti.