Delhi-a Jantar Mantar-ah Jat hoin nawrh huaihawt

Haryana sorkar hnuaia hna lak leh zirna-ina an hnam chanpual dahsak phuta nawrh huaihawt mek, Jat hnam chuan nimin khan Delhi-a Jantar Mantar-ah an pungkhawm.

Delhi khawpuia lungawi lohna lantirnaa tel tur hian Haryana, Delhi, Uttar Pradesh, Uttarakhand, Himachal Pradesh, Punjab, Rajasthan leh Madhya Pradesh aṭangin Jat hnam mi tam tak an pungkhawm.

Jat ho nawrh huaihawt vang hian Sansad Marg chu khar a ni a, NH24, Delhi-Agra highway, NH-1, CP leh ITO-a lirthei chevel thlengin a nghawng buai hle.

All-India Jat Aarakshan Sangharsh Samiti (AIJASS) president Yashpal Malik chuan an hnam tana rorelna dik phutin nawrh huaihawt a ni tih a sawi a, President leh Prime Minister hnenah pawh an thil phut chungchangah memorandum an thehluh tur thu a sawi.

Jat ho hian an thil phut nawrna kawng khat atan Delhi-ah tractor leh bawng tawlailir hmanga kawngzawh huaihawt a tum bawk a, an neih ni tur erawh an la tifel lo. An thil phut a hlawhtlin hma chuan sorkar nawr chhunzawm zel an tum. AIJASS hian nikum khan hun rei tak lungawi lohna an lo lantir tawh a, hun eng emaw chen an chawlh lailawk hnuah kumin January 29 aṭang khan an chhunzawm leh a ni. Nikuma nawrh huaihawt chhunga tharum thawhna chhuakah mi 30 in nunna an lo chan phah tawh a ni.

Delhi police-te chuan nimina Jat hnamten nawrh an huaihawtna hmunah hian venhim hna thawk turin police 4,000 vel dah an ni tih an sawi.