Congress-in thupha chawi turin PM phut

Congress Party chuan an party vice president Rahul Gandhi-a thusawi her danglam leh hemi hmanga mipuite thu dik lo hrilhah Prime Minister Narendra Modi-a chu puhin, mipui hmaa thupha chawi turin an phut.

Congress party thupuangtu, Randeep Singh Surjewala chuan assembly inthlan neihna tur, hmarchhak state Manipur-a Rahul Gandhi-a’n a campaign-naa hmarchhak state hmasawnna chungchang a sawi, India ram ṭhanna tura a pawimawh zia a sawite chu Uttar Pradesh-ah thu a sawi naah Modi-a chuan dik lo takin a lakkawi sak niin a sawi. Surjeala chuan Modi-a chuan Manipur leh hmarchhak state dangten hma an sawn chu a duhpui lo niin a sawi.

Manipur-a Gandhi-a thusawi leh, Uttar Pradesh-a Modi-a thusawina video-te pawh Congress party hian an tichhuak a ni.

Modi-a hian Uttar Pradesh-a rally-a thu a sawiah, Rahul Gandhi-a’n Manipur-a a campaign-naah coconut tuite Manipur-in a la thawnchhuak dawn tia a sawi ni awm taka chanchinbu ṭhenkhatin an tarlan chu sawichhuakin, coconut chu Kerala state lama chin a nih zawk avangin tiel takin Rahul Gandhi chungchang hi a sawi a, mi talent nei tak leh hmalam thlir thui tak a ni tiin nuihzat takin a sawi a ni.

Mahse Rahul Gandhi-a thusawi ni anga sawi hi thu dik lo a ni a, Thawhlehni-a Manipur-a a campaign hian Rahul chuan Manipur chu an state-a thei chin, serthlum, ser leh lakhuihthei hralhchhuah lama hmahruaitu a nih chungchang a sawi zawk a ni. Hei vang hian Congress party chuan PM chu Uttar Pradesh mipuite thu dik lo hrilhah puhin, thu dik tawk lo a sawi avang hian Congress party lakah chauh ni lo, ram mipuite chungah ngaihdam a dil tur a ni, a ti. Modi-a chetdan chuan Prime Minister chet dan tur a ni lo tiin, PM office zahawmna a tihniam a, amah pawh zak tur a ni tiin Congress party chuan a sawi.