Dodalna awm vangin Steel Flyover Project titawp dawn

Karnataka sorkar chuan Bengaluru khaw­puia cheng vaibelchhe 1,761 senna tur, Steel Flyover Project siam a tum chu environmentalist leh rights group-te an dodal avangin a titawp dawn.

Bengaluru khawpuia Steel Flyover siamna turah hian thingkung 800 chuang kih a ngai dawn a, hei hi leilung humhalhtu pawl leh rights group hrang hrangte chuan an duh lo a ni.

Project tihtawp tura nawrna a nasat avangin steel flyover siam an tumna chu an ṭhulh ta niin Bengaluru Development Minister KJ George chuan a sawi.

Bengaluru Development Authority (BDA)-in flyover project, km 6.72-a thuia siam a tumna hi khawpui chhung traffic tawt lutuk tihziaawmna kawng khat atana a ruahman a ni.

Mahse flyover siamna turah hian thingkung 800 chuang zet kih a ngaih dawn avangin project hi titawp turin sorkar nawr a ni a, loneitute pawhin an dodal a ni. Jawaharlal Nehru Planetarium pawhin flyover siam a nih chuan khawthlirna te a hliah vek dawn avangin an duh loh thu an sawi bawk.

Bengaluru steel flyover siam hna hi kum 2016 October thla khan construction company lian, Larsen& Toubro kutah pek a ni.