Vawiin-ah UP inthlan thawh rukna nei dawn

Uttar Pradesh assembly inthlan thawh rukna chu vawiin hian district pasarih huam chhunga constituency 49-ah neih a ni dawn.

Constituency 49-a inthlan neih turah hian candidate 635 an awm a, hmeichhe candidate 60 an tel. Inthlana chuh tumte hi national party paruk, regional pary panga, unrecognised party 67 candidate-te bakah, independent candidate 175-te an ni. Candidate zingah hian mi hausa tawntaw, crorepati 160 an awm. Chawhrualin candidate pakhat hausakna hi cheng vaibelchhe 1.59 hu a ni. BSP candidate zingah mi hausa tawntaw an tam ber a, 35 an awm. 

BJP-in candidate hausa tawntaw 33 neiin, SP-in 28, Congress-in 6, RLD-in 8 an neih bakah, independent candidate zingah 23 an awm bawk. Inthlan thawh ruknaa candidate zinga hausa ber chu BSP candidate Shah Alam a ni a, cheng vaibelchhe 118 hu a nei a, a dawttu Vinayshankar chuan cheng vaibelchhe 67 chuang neiin, Aijaj Ahmad chuan cheng vaibelchhe 52 chuang a nei bawk. Candidate zinga pathum erawh chuan an affidavit-ah sum engmah an neih loh thu an tarlang thung.

Thubuai nei lai 126 an awm a, an zinga 109-te chu thubuai rip tak, tualthah, tualthah tum, mi rukbo leh hmeichhe chunga pawikhawihna thlen thubuai neilai an ni. Thubuai nei zingah hian BSP candidate 24, BJP 18, SP 15, CPI 4, Congress 3 leh independent 22 an awm a ni.

Candidate 338 chu zirna lamah graduate leh a chung lam an ni a, Class 5 - 12 inkar mi 229 an awm. Candidate 38 chu ziak leh chhiar thiam niin, ziak leh chhiar thiam lo pathum an awm bawk.