Ram 3 tlawh turin Vice President a zin

Vice president M Venkaiah Naidu chu ram pathum - Gabon, Senegal leh Qatar tlawh turin nimin khan a zin chhuak.

Heng ram pathumte hi India Vice President-in an tlawhna hmasa ber tur a ni.

Venkaiah Naidu hian Gabon a tlawh hmasa ber dawn a, June 1 thleng a cham dawn a, a cham chhung hian an ram prime minister Rose Christiane Ossouka Raponda, president Ali Bongo Ondimba leh mi pawimawh dangte a hmu ang. Gabon-a sumdawng pawlte kawmin, India mi awmte pawh hun a hmanpui dawn bawk.

June 1-ah Senegal panin June 3 thleng a cham dawn. Senegal president Macky Sall, National Assembly president Moustapha Niasse leh mi pawimawh dangte a hmu dawn a ni. India leh Senegal hian kumin hian an inpalai tawn kum 60-na an hmang a ni.

Vice President hian June 4-ah Qatar panin, June 7 thleng a cham ang. Qatar Deputy Amir Sheikh Abdullah Bin Hamad Al Thani kawmin, ram pahnihte thawhdunna an ennawn dawn a ni. Qatar-a sumdawng hotute a kawm dawn bawk a ni. Kum hnih liam ta chhunga Qatar-in Indian company hrang hranga investment a tih hi USD tluklehdingawn hnih chuang a tling a ni.