Punjab sorkarin Moosewala thih dan chhui tur judicial commission din dawn

Punjab sorkar chuan Pathiannia kah hlum, Punjabi singer leh Congress hruaitu, Shubhdeep Singh Sidhu, Sidhu Moosewala tia hriat lar thah a nih dan chhui turin judicial commission a din dawn tih nimin khan a sawi.

State sorkarin security pek a tihtlem sak tuk, Pathianni khan kum 28 mi, Moosewala hi Mansa district-a Jahawarke khuaah kah hlum a ni. Police-te chuan gang pahnih, Lawrence Bishnoi leh Lucky Patial pawlte inkara inhuatna thil vanga he tualthahna hi thleng nia a lan thuan sawi.

Punjab-a AAP sorkar chuan kar liam ta khan mi 424-te hnenah venhimna pek ṭhin chu a tihtlem sak a, an zingah hian MLA hlui leh ṭanglai te, sakhaw hotu leh police officer-te pawh an tel. Hei hi eptu party-ten nasa takin an sawisel a ni. Security pek a tihtawp zinga mi Moosewala kahhlum a nih zui tak avangin AAP sorkar an bei zui na hle a, dan leh thupek tlakchhiat chhanah an puh.

Chief minister Bhagwant Mann chuan Moosewala pa, Balkar Singh Sidhu ngenna angin judicial commisison hi Punjab and Haryana High Court-a judge ṭanglaiin a ho dawn tih a sawi. Commission-in a chhuinaah hian state sorkar pawhin theitawpin a pui zel dawn tih a sawi bawk. CM hian Moosewala chhungten a thih dan CBI leh NIA chhui tir an ngenna pawh a remti nia sawi a ni bawk.

Moosewala thihna kaihhnawihah hian mi paruk chu man an ni tawh a, Delhi Police Special Cell chuan gang leader Lawrence Bishnoi leh a thurualpuite, Kala Jathdei leh Kala Rana-te pawh thu an zawtfiah tawh bawk.

Chandigarh Youth Congress worker-te chuan nimin khan Chandigarh-a an party office kawtah AAP sorkar laka lungawi lohna an lantir. Punjab Congress hotu Amarinder Singh Warring chuan Sidhu Moosewala sunna leh zahna lantirna atan a hospital aṭanga Gurudwara Sahib inkarah 'peace march' an nei dawn tih a sawi.