Hri kai mek zinga 70% dawn state pariata mi

India rama Covid-19 kai mek zingah 70% dawn chu state/UT pariat - Maharashtra, Kerala, Delhi, Rajasthan, Uttar Pradesh, Karnataka, West Bengal leh Chhattisgarh-a mi an ni tih union health ministry chuan a sawi. 

Ram chhunga hripui vanga thi tawh zinga 83.80% chu state/ UT 10 - Maharashtra, Karnataka, Tamil Nadu, West Bengal, Uttar Pradesh, Andhra Pradesh, Punjab, Gujarat, Madhya Pradesh leh Delhi ami an ni bawk. 

Supreme Court chuan sorkar laipui hnenah Covid-19 vaccine siam chhuah a nih hma chuan hri darh zel tur venna atan dan khauh zawk siam a, heng dante hi kenkawh a nih theihna atana theihtawp chhuah turin a ngen. 

Court chuan ram pum huapa hman tur kaihhruaina khauh zawk sorkarin a siam a ngai a ni tiin, state hrang hrangte pawh politics thilte dah ṭha a, hripui leng dona kawnga theihtawp an chhuah tlan a ngai tih a sawi bawk. 

Justice Ashok Bushan kaihhruai judge pathum awmna bench chuan, mipui chhuak vak leh pungkhawm ṭhinte an thlirin, an zinga 60% vel chauhin hmaituamna an vuah ṭha a, 30% vel erawh chuan hmaituamna chu an hmang ṭha lo hle tih an sawi. November thla chhunga ram chhunga hri leng dinhmun chu a ṭha lo chho hle a, hei vang hian khauh zawka hma lak zel a nih loh chuan sorkar laipuiin hri venna atana a lo thawh tawhnate chu awmze  nei loin a awm mai dawn a ni, an ti. 

Gujarat-a Rajkot-a Covid-19 hospital, Uday Shivanand Hospital-ah nimin zing khan kangmei a chhuak a, hri kai enkawl mek zinga panga an thi a, enkawl lai 28-te erawh chu an chhanchhuak hman a ni. 

Kangmei hi zing dar 1 velah hospital ICU aṭangin a chhuak a, kangṭhelhtute kal nghal a, damlo enkawl mek tam zawk chu chhanchhuakin Covid-19  hospital dangah sawn nghal an ni. Kangmei rawn chhuah ṭanna hi hriat a la ni lo a, chief minister Vijay Rupani chuan chhui chiang turin thupek a tichhuak nghal. 

August thla khan Ahmeda­bad-a Covid-19 kaite enkawlna, private hospital-ah kangmei a lo chhuak tawh bawk a, hri kai enkawl lai pariat an thi a ni.