Mehbooba Mufti hreng nawn leh

Jammu and Kashmir chief minister hlui leh Peoples' Democratic Party (PDP) president, Mehbooba Mufti chuan dan dik lo taka hren leh a nih thu leh, a fanu Iltija pawh house arrest-a hren a nih thu nimin khan a sawi. 

Mehbooba Mufti chuan Hizbul Mujahideen commander Naveed Babu thubuai kaihhnawiha National Investigation Agency (NIA) ten an man, PDP youth wing president Waheed Parra chhungte tlawh a tum chu J&K thu­nei­tute chuan ni hnih chhung an dang tawh tih a sawi. Hetih lai hian BJP minister leh an ṭhuihhruaite erawh an duhna hmun apiangah an kal thei thung a ni, a ti. A in gate pawn lama sipai motor ding thlalak chu a twitter-ah a tilang bawk a ni. 

Waheed Parra hi kumin kumtira J&K aṭanga tlanchhuah tum Hizbul Mujahideen firfiak pahnih Asif Ahmad leh Naveed Babu te chungchangah inrawlha puh a nih avangin man a ni. Mahse Mufti chuan an man chhan hi thu belhchian dawl lo niin a saiw thung. Parra chhungte tlawh a tum avangin ama fanu ngei pawh chu pawn chhuak thei loa hren zui a nih thu a sawi. 

BJP kaihhruai NDA sorkarin nikum August thlaa Jammu and Kashmir special status pekna, Article 370 a tihtawp hnu khan J&K-a political leader eng emaw zat chu pawn chhuak thei loin hren zui an ni a, an zingah hian Mufti pawh hi a tel. Kumin October-ah khan chhuah zalen a ni chauh a ni.