Farm law duh loa kawng zawhte Delhi-ah luh phalsak

Sorkar laipuiin farm law a siam thar duh lohna lantira nawrh huaihawt, loneitu pawlte chu sorkar laipui chuan nimin khan Delhi khaw chhunga an luh phalsak a, boruak ṭha tak hnuaia Burrari ground-a nawrh huaihawt a phalsak.

Nilaini khan farm law duh lohna lantir hian ram pum huap nawrh huaihawt a ni tawh a,  hei bakah hian Punjab, Rajasthan, Uttar Pradesh leh Haryana-a loneitute chuan Delhi pan hian kawng an zawh bawk a ni. Delhi police-te chaun Delhi-Haryana border-ah loneitute hi lo dangin,  barbed wire-te an lo siam bakah hnawh darh tumin tuiin an lo phuh bawk. 

Hun eng emaw chen Delhi police-te nena an innawr buai hnuah, sorkar laipui chuan loneitute hi Delhi khawpui chhunga an luh a phalsak ta a ni. Delhi police-ten luh phalsak an nih thu an puan hnuah pawh tear gas leh water cannon hmangin an la phuh chhunzawm tho a, pungkhawm zinga ṭhenkhat chuan hliam an tuar a ni. 

Loneitu pawl hrang hrang intelkhawmte hian Delhi khawpuia Ram Lila Maidan-ah farm law thar duh lohna lantir a, a ṭul dan azirin thla tam tak nawrh huaihawt inhuamin Delhi hi an pankhawm a ni. 

Loneitute chuan nawrh huaihawt hi ramchhunga loneitute pawl hrang hrang 500 in an thlawp niin a sawi. Mahse sorkar laipui chuan nawrh huaihawtna hmun atan hian Ram Lila Maidan chu a remti lo a, Burrari ground zawk a phalsak. Nawrh huaihawtte hian buaina an siam lohna turin police-ten an veng zui bawk ang.