RBI Govenor Urjit Patel-a’n vauna a dawng

Reserve Bank of India Govenor Urjit Patel-a chuan a hna aṭanga bang tura vauna a e-mail-ah a dawng a, vauna thawntu hi nimin khan Nagpur-ah police-te’n an man.

RBI Governor hian February 23 khan vauna hi a dawng a, a hna aṭanga a ban loh chuan amah leh a chhungte tan a pawi theih tur thu hrilh a ni. Patel hian a mail dawn hi RBI officer hnenah hriattirin, a ni hian Mumbai police cyber cell hnenah complaint a thehluh sak ta a ni.

Police-te chuan RBI Governor mail dawn hi an chhui nghal a, vauna thu hi Nagpur-a cyber cafe aṭanga thawn a ni tih an hrechhuak a ni. Hemi hnu hian Mumbai police cyber cell team chu Nagpur-ah kalin, mail thawntu nia hriat kum 37 mi, Vaibhav Baddalwar chu an man ta a ni. Police-te chuan Indian Penal Code section 506(2) (criminal intimidation) hnuaiah thubuai an ziak lut nghal a ni.

Police-te chuan thu an zawhfiahnaah Baddalwar hian RBI Governor hi vauna thu a thawn tih pawh a inpuang tawh niin an sawi. Baddalwar hi ram pawn lama lehkha zir ṭhin niin, tunah hna neiloin a awm mek a, a rilru hah leh beidawngin Patel-a vauna hi a thawn ta nia an rin thu police-te chuan an sawi.