Kerala CM lu man siamtu RSS aṭangin hnawtchhuak

Madhya Pradesh-a Rashtriya Swayamsevak Sangh (RSS) hruaitu, Kundan Chandravat chu, Kerala Chief Minister Pinarayi Vijayan-a lu man atana cheng vaibelchhe khat pek a tiam avangin RSS aṭangin hnawhchhuah a ni, police-te’n thubuai an siamsak bawk.

Kundan Chandravat hian tunhnaia vantlang inkhawma thu a sawinaah, Kerala-a rorellai CPI-M worker-te’n RSS worker an thah avangin phuba lak a tum thu sawiin, he thila mawphurhtua puh CM lu man atana sum tam tham tak pek a inhuam thu hi a sawi a ni. A thusawi avang hian Chandrasavat-a lakah hian IPS section 505(1) (B) hnuaiah thubuai ziah luh a nih thu, Ujjain district Superintendent of Police Manohar Verma chuan a sawi a, mahse man erawh la ni lo tih a sawi bawk.

Chandravat-a thusawi lai video hi a darh nasa hle a, CM Vijayan-a chu RSS mi leh sa, pawisawi lo mi 300 zet thah an nih chungchang haiderah a puh a ni.

RSS chuan Chandravat-a’n CM Vijayan-a puhna leh, a lu man atana sum tam tham tak pek a phal thu a puang chu an dem thu an sawi ve nghal a, Ujjain khuaa RSS Mahanagar Sah Prachar Pramukh (joint chief of publicity) a nihna pawh hlihsak nghal a nih thu an sawi. RSS chuan tharum thawhna thlen a thlawp ve lo tih an tarlang.

Kerala-ah hian rorellai CPI (M) leh BJP-RSS inkarah buaina a chhuak a, a bikin CM chawr chhuahna, hmarlama Kannur district-ah chuan an buai ngun hle. Party pahnihte hi tharum thawhna thlengṭhinah mawhphurtuah an inpuh tawn a ni.

Chandravat chuan a thusawi avang hian sawisel leh beih a tawk nasa hle tih sawiin, thaha vauna pawh a dawng niin a sawi. CM chungchanga a thu lo sawi dan avang chuan pawi a tih thu leh a inchhir thu thuchhuah siamin a tichhuak bawk.