ED-in Delhi minister Satyendar Jain an man

Enforcement Directorate (ED) chuan Thawhṭanni tlai khan Delhi health minister leh Aam Aadmi Party (AAP) hruaitu Satyendar Jain chu 'hawala transaction' case-ah an man.

ED hian thla khat liam taah khan Jain-a thil neih, cheng vaibelchhe 4.81 hu chu an lo hrek sak tawh bawk.

Foreign Exchange Mangemaent Act (1999) hnuaia sum inthawnkual dan chi khat, hawala transaction hi phal a ni lo . Minister hi Kolkata-a company pakhat nen hawala transaction an ti niin ED offcial-te chuan an sawi a, Prevention of Money Laundering Act (PMLA) hnuaiah man a ni.

Central Bureau of Investigation (CBI) chuan kum 2017, August thla khan Jain leh a chhungte lakah hian dan kalha pawisa, Rs vbc 1.62 inthawn kaihhnawihah thubuai an lo ziaklut tawh a ni. Jain leh a chhungte hi sumdawnna a taka kalpui si loa a hminga company pali siamah an puh a, heng company hmang hian sum inthawn ṭhinah an puh.

CBI-in FIR a thehluh behchhanin, EC hian Jain hi an chhui zui ve leh a, Thawhṭanni khan an man ta a ni.

Delhi Minister man hian Delhi chief minister Arvind Kejriwal kaihhruai AAP sorkar leh central-a BJP sorkar inkar boruak pawh a tihchhiat zual rin a ni. Eptu party hruaitute chuan sorkar laipui hian central agency-te chu eptu pawlte beihna atan dik lo takin a hmang niin an lo puh fo tawh bawk.

Kejriwal-a'n a Minister thlavang hauh
Delhi chief minister Arvind Kejriwal chuan Enforcment Directorate (ED) in a minister Satyander Jain laka thubuai an siam chu thu dik lo leh phuahchawp a ni tih sawiin, Jain chu politics thil vanga beih a ni, a ti.

Kejriwal chuan, "ED-in Jain-a laka thubuai an ziahluh chu uluk takin ka chhiar a, an phuahchawp mai a ni. Central sorkarin a thunun agency-te hmalakna hi politics kaihhnawih vek a ni. He thilah pawh hian politics thil vang bawkin Jain hi bitum a ni ve leh bawk," tiin he thubuai hian a awh rei dawn lo a, a tawpah chuan thudik chu a dingchang leh ngei dawn a, judiciary system chu an ring tawk tih a sawi.

Delhi deputy chief minister Manish Sisodia pawhin AAP-in in-charge atana Jain an dahna, Himachal Pradesh-a inthlan lo awm tur thlirin Jain hi man a ni, a ti. "Kum riat chhung chu Satyendar Jain lakah thubuai dik lo hi siamsak a ni tawh. ED hian vawi eng emaw zat an ko a, mahse engmah hriat belh tur a awm loh avangin kum eng emaw chen chu an ko tawh lo. Mahse Himachal election in-charge-a dah a nih hnuah, ED chuan Jain lakah hma an la leh ta a ni," a ti. Himachal Pradesh-ah BJP hi an che ṭha lo a, Jain hi Himachal-a a kal theih lohna turin an man a ni tiin Sisodia chuan a sawi a ni. Himachal Pradesh hi kumin kumtawp lamah an inthlang dawn a, AAP chuan Punjab inthlana hnehna ropui tak an chan ang kha chan leh ngei tumin ṭan an la chho hle a ni.