J&K : School chhungah zirtirtu kap hlum

Jammu and Kashmir-a Kulgam-ah Government High School-a Hindu zirtirtu hmeichhia chu nimin khan school chhungah firfiakten an kap hlum tih police-te chuan an sawi.

Police official chuan Gopalpora khuaah he pawikhawihna hi a thleng tih sawiin, firfiakten an kah hlum zirtirtu hi Samba, Jammu division-a mi a ni. Pawikhawihtu firfiakte chu man chhuah thuai an nih tur thu a sawi bawk.

Firfiakten school compound-a pawikhawihna an thlen hnu hian school leh a chhehvel hi khar nghalin, security force-te chuan firfiakte hi zawngin beihpui an thlak nghal a ni.

Jammu and Kashmir chief minister hlui leh PDP president Mehbooba Mufti chuan BJP kaihhruai sorkar laipuiin J&K-a boruak a pangngai tawh nia a tarlan chungchang chu a sawichhuak nghal. "Sorkar laipui chuan Kashmir boruak chu a pangngai chho tawh tia a sawi lai rengin, civil mite thahna a thleng fo a ni," a ti. Kumin chhungin civil mi 15 chu firfiakte kutah an thi tawh a, an zingah hian Kashmiri Pandit pawh an tel.