INS Viraat chawlhtir tawh dawn

Indian Navy lawnglian, aircraft carrier INS Viraat chu kum 56 zet hman a nih hnuin nimin khan Mumbai-ah chawlhtir a ni ta.

Khawvela aircraft carrier service rei ber, INS Viraat hi British siam niin, ram pahnihin an hmang a, a kal kual thui zawng hi chhutin khawvel hi ṭum 27 zet hel chhuak tawh ang a ni.

INS Viraat chawlh tir hun puala inkhawm hi Mumbai lawngchawlh hmunah neih a ni a, chief of naval staff S Lamab leh British Royal Navy 1st Sea Lord, admiral Sir Philip Jones-te’n an hmanpui a ni. He lawnglian hi thla li chhunga leitu an awm loh chuan ṭhiah a ni ang.

Navy hoin ‘Grand Old Lady’ tia an sawi, INS Viraat hi kum 1959 khan siam zawh niin UK-a Royal Navy hman turin hlan a ni a, HMS Hermes tih a ni. Royal Navy-te hian kum 1984 khan an chawlh tir a, kum 1987, May 12 khan India Navy hman tura hlan ve leh a ni. He indo lawnglian hi aircraft chi hrang hrang - Sea Harriers, White Tigers, Seaking 42B, Seaking 42C leh Chetak helicopter-te pawhin an lo hmang tawh a ni.

INS Viraat hian tuipuiah ni 2,250 zet hun hmangin, tuipui mel 5,88,288 zeta thui a kal kual hman. Indian Navy-te hian kum 29 an hmang hman a, British siam indo lawnglian an hman hnuhnun ber a ni.