SC-in sorkar laipui leh RBI chhanna pe turin hriattir

Supreme Court chuan Reserve Bank of India leh sorkar laipui hnenah pawisa note hlui thleng theih hun, March 31 thleng a tiam chunga mipuiten an thleng theih loh chungchangah chhanna pe turin a hriattir.

Chief Justice JS Kehar kaihhruai bench chuan RBI leh sorkar laipui chu Zirtawpni hma ngeia zawhna chhanna hi pe turin nimin khan a hriattir a ni.

Nikum November 8-a sorkar laipuiin pawisa note lian pahnih, Rs 500 leh Rs 1,000 note a tih thih hnua Prime Minister Narendra Modi-a’n thu a sawiah, pawisa note thite hi bank hrang hrangah December 31, 2016 thlenga thleng theih a nih tur thu leh, hemi hnuah pawh RBI branch thlan bik­ahte March 31, 2017 thlengin thleng chhunzawm a nih theih tur thu a sawi .

Supreme Court-ah hian Sharad Mishra chuan petition theh lutin, sorkar laipuiin March 31 thleng hun a tiam chungin RBI branch-ah ram pawn lama awmte chauh pawisa thleng phalsak an ni tih a sawi a, hei vang hian insawifiah turin RBI leh sorkar laipui hi hriattir an ni ta a ni.