SBI-in ATM hman man chawitir dawn

State Bank of India chuan kum nga zet a kalpui tawh loh hnuah, April 1 aṭang hian saving account-a minimum balance dah lo te chu a chawitir tawh dawn a, hei bakah hian service dang, ATM hmannaah pawh fee a chawi tir tawh dawn.

Ramchhunga bank lian ber, SBI hian saving account holder-te chu thla khat chhunga ṭum thum chin sum deposit chu fee a la dawn lo a, vawi thum aia tam chinah chuan transaction ṭum khatah service tax Rs 50 a chawi tir zel tawh dawn a ni. Current account aṭang chuan sum a chawi tir zat hi Rs 20,000 thlenga sang pawh a ni thei dawn a ni.

Saving account-a Monthly Average Balance (MAB) dah tling lote chu penalty, Rs 100 bakah service tax a chawi tir tawh dawn bawk. Sum awm zat hi bithliah chin a in ang lo a, metropolitan area-ah chuan account balance hi MAB aia 75% a hniam a nih chuan Rs 100 leh service tax chawi tir an ni ang a, MAB aia 50% chin leh a aia tlem awm chu Rs 50 leh service tax chawi tir an ni bawk ang.

Sum chawi tur zat leh MAB hi bank awmna hmun a zirin a danglam a, thingtlang lam branch-ah chuan minimum balance tura bithliah hi tihhniam a ni.

SBI senior official chuan, SBI hian mininum balance dah ngei tura phutna hi customer thar tam zawk an hip luh theih nan kum 2012 aṭang khan an hmang chhunzawm ta lo niin a sawi. Mahse he dan hi April 1 aṭangin an hmang thar leh dawn a, Reserve Bank of India pawhin minimum balance dah tling lote chawi tir phalna hi bank-te hnenah a pe tawh bawk.

ATM aṭanga a thlawna sum lakchhuah theih zat pawh bithliah a ni dawn bawk. Bank dang ATM aṭang chuan thla khatah ṭum thum thleng chawitir an ni lo ang a, vawi thum aia tam hman a nih chuan vawi khatah Rs 20 zel chawitir an ni tawh ang. SBI ATM chu ṭum nga thleng a thlawnin an hmang thei dawn a, ṭum nga hnuah chuan vawi khat hmanah Rs 10 an chawi a ngai tawh dawn a ni.

SBI ATM aṭanga sum lakchhuah hnua balance la awm zat chu Rs 25,000 aia a tam chuan ATM hman man chawitir a ni dawn lo a, bank dang ATM hmang chuan balance Rs nuai khat chuang a la awm chuan chawi tir a ni lo bawk ang. Debit card holder-te’n SMS alert an dawn chuan thla thum danah Rs 15 zel an chawi dawn bawk.