Vawiin-ah UP inthlan thawh hnuhnung ber nei dawn

Uttar Pradesh inthlan thawh sarihna leh a hnuhnung ber tur chu vawiin hian district pasarih huam chhunga assembly seat 40-ah neih a ni dawn.

Assembly bial 40-a inthlan neih turah hian candidate 535 an awm a, hmeichhe candiate 47 an tel. Candidate zingah hian mi hausa tawntaw, crorepati 132 zet an awm. Chawhrualin candidate pakhat hausakna hi cheng vaibelchhe 1.58 hu vel a ni. Candidate 95 chu thubuai rip tak neilai an ni a, an thubuai neih zingah hian tualthah, tualthah tum, mi rukbo leh hmeichhe chunga pawikhawihna thlena puhna te a tel a ni.

Zirna lamah chuan candidate zinga 245 chu graduate leh a chung­lam an ni a, class 5 - 12 inkar mi 229 an awm a, 44 chu ziak leh chhiar thiam niin, academic qualification tarlang lo mi pariat an awm.

Candidate zinga mi 376 chu kum 25-50 inkar an ni a, kum 51-80 inkar mi 147 an awm bawk.

Assembly seat 403 awmna, Uttar Pradesh assembly inthlan hi thawh sariha ṭhen niin, February 11 (73 seat), Feb 15 (67 seat), Feb 19 (69 seat), February 23 (52 seat), February 27 (52 seat) leh March 4 (49 seat) te khan vote thlak a ni tawh. Inthlan neih tawha vote tlak dan chu, a thawh khatnaah 64.22%, thawh hnihnaah 65.26%, thawh thumnaah 61.16%, thawh li-na 60.37% , thawh nga-na 57.37% leh thawh ruknaah 57% a ni.

Vote tla-te hi March 11 hian chhiarin result puan nghal a ni ang.