Lucknow-ah IS firfiak kaphlum

Uttar Pradesh Police Anti -Terror Squad (ATS) commando-te chuan Lucknow-a Thakurganj bial-ah Islamic State (IS) firfiak nia hriat an kaphlum.

ATS commando-te hian darkar 12 zet firfiak dapchhuak tura beihpui an thlak hnuah, Is firfiak ni ngeia hriat mi pakhat an kaphlum tih, Additional Director General of Police (Law and Order) Daljit Chaudhary chuan a sawi.

Dajit Chaudhary chuan, “ATS commando-te hian firfiak bihrukna in hi luhkhungin an bei a, firfiak pakhat kahhlum a nih bakah a bihrukna in aṭang hian pistol pariat, silai mu 650, bomb siamna hmanrua, rangkachak, pawisa, passport leh SIM card te an man bawk a ni”, a ti. Firfiak kahhlum hi Saifullah tia hriat a ni.

IG ATS Aseem Arun pawhin commando-ten an kahhlum chu IS active member a nih thu a sawi.

ATS hian intelligence hnen aṭangin firfiak kahhlum tak, Saifullah chu Madhya Pradesh-a rel-a bomb tihpuahnaah a inhnamhnawih thu an dawn hnuah, man tumin beihpui an thlak zui nghal a ni. ATS chuan IS firfiak hi a nung chung ngeia man an tum a, mahse a bihrukna in aṭang hian a lo beih let avangin an kaphlum ta a ni.

Thawhlehni khan Bhopal-Ujjain inkara tlan, khualzin phur rel-ah bomb tihpuah a ni a, mi 10-in hliam an tuar a ni. Rel beihna thleng kaihhnawihah hian mi pathum man an ni tawh.