Damchhung tang turin Saibaba hrem

Delhi University professor GN Saibaba chu Maoist hel nena inzawmna an neih avangin Unlawful Activities (Prevention) Act hnuaiah damchhung tang tura hrem a ni. A rual hian JNU zirlai Hem Mishra, journalist Prashant Rahi leh midang pathum pawh damchhung tang tura hrem an ni bawk.

Maharashtra-a Gadchiroli session court chuan nimin khan Saibaba leh mi dang panga-te hremna tur hi a puang a, Vijay Tirke chu kum 10 tang turin a hrem tel bawk a ni.

Delhi Ram Lal Anand College-a English professor, Saibaba hi Maoist hel nena inzawmna neia puh a nih avangin kum 2013 khan a chenna in aṭangin man a ni tawh a, a hnu lawkah JNU zirlai Hemant Mishra chu man a ni ve leh a ni. Police-te’n thu an zawhfiahnaah, Mishra chuan DU professor leh Chhattisgarh-a Maoist-te inkarah palai atan a ṭan ṭhin thu a sawi.

Saibaba leh midangte hi Unlawful Activities Prevention Act (Amendment 2008) hnuaiah India laka indo puangah puhin thiam loh chantir an ni tawh a, mahse kum 2016 March thla khan Justice JS Khehar leh Justice Nagappan awmna Supreme Court bench chuan a hriselna ṭha tawk loh avangin professor hi bail-a chhuah a dilna an lo remtihsak tawh a ni. Wheel-chair hman ngai, professor hi 90% rualban lo a ni a, a kawng hnuai lam a che thei lo a ni.