President thlan hmain EC-in by-election buatsaih dawn

Election Commission chuan President term a zawh hma ngeiin Lok Sabha seat thum leh Assembly seat 12 ruakte hnawhkhahna turin by-election buatsaih a tum.

President Pranab Mukherjee-a term hi July 24 khian a tawp tawh dawn a ni. EC official chuan by-election neih hun tur hi puan thuai a ni dawn tih sawiin, seat ruak awmte hi April thlaah chuan hnawhkhah hman vek tum a ni tih a sawi.

Lok Sabha seat ruakte chu Jammu and Kashmir-a Anantnag leh Srinagar bial bakah, Kerala-a Malappuram bial a ni. Punjab-a Amitsar bialah chuan February 4 khan assembly inthlan neih rualin by-election neih nghal a ni.

President hi electoral college-in a thlang ṭhin a, electoral college hi MP leh state legisative assembly member-te an ni. President thlang thei chin hi 4,896 an awm a, heng hi MLA 4120 leh elected MP 776 te an ni. Lower House-a Anglo-Indian community-a nominated member pahnih leh, Rajya Sabha-a nominated member 12-te chuan an thlang ve thei lo thung.

Nikum December thla khan poll panel chuan Lok Sabha leh Rajya Sabha-ah seat ruak hnawhkhat ngai zat hi a zawt a, state assembly hrang hrangte a zawt nghal bawk. Seat ruak hnawhkhah loa awm zat hi hriatchian a nih tawh avangin by-election hi buatsaih thuai rin a ni.

Kum 2012 khan President thlan tur chungchang thuchhuah hi June 12-ah tichhuakin, July 19-ah vote thlak a ni. President Mukherjee hian hemi kum July 25 aṭang khan a office a luah ṭan a ni.