Delhi airport security a ṭha tawk

Central Industrial Security Force (CISF) Director General O.P. Singh chuan Delhi airport security chu a ṭha tawk a, khawvela airport langsar tak tak ai pawhin security a ṭha zawk niin a sawi.

O.P Singh chu London leh Dubai airport-te aiin Delhi airport security chu a ṭha zawk a, Mumbai, Hyderabad, Bengaluru, Kolkata leh Chennai airport-te pawh, Dallas/Forth Worth International leh Los Angeles airport-te aiin security lamah an ṭha zawk a ni, a ti. Brussel-a headquarters nei, Airport Council International-in Airport Service Quality (ASQ) rating a siam dante sawiin, Singh chuan India rama aiport tam tak chu ram danga international airport aiin a ṭha zawk tih a sawi.

Singh chuan tehna hrang hrang siamah security staff-te inpekna leh ṭangkaina te, security inspection kalpui dan te, hun nghah rei lam te leh khualzinten an thlamuan dante hman a nih thu a sawi.