ED-in thu zawhfiah turin Sonia Gandhi leh Rahul Gandhi an ko
Enforcement Directorate chuan Congress presidetn Sonia Gandhi leh a fapa, MP Rahul Gandhi-te chu National Herald newspaper sum thawnchhuah kaihhnawihah thu zawhfiah turin a ko.
ED hian Rahul Gandhi hi June 2, leh Sonia Gandh hi June 8-ah inlan turin a ko a, mahse Rahul Gandhi hian ram pawna a awm avangin a inlan hun hi June 5 lamah sawn turin a dil nia sawi a ni.
Congress MP Abhishek Manu Singhvi chuan nimina press conference a neihah ED-in Gandhi-te nufa an koh thu hi nemnghetin, Sonia Gandhi chu an koh niah hian a inlan thei dawn a, mahse Rahul Gandhi tan erawh hun dang ruahman sak tura an party-in an ngensak tur thu a sawi. Sanghvi chuan Gandhi-te nufa koh an nihna chhan, money laundering leh money exchange chungchangah hian finfiahna engmah a awm lo tih a sawi bawk.
National Herald hi Young India Pv Limited ta niin, Associated Journals Limited (AJL)-in a tichhuak a ni. Sonia Gandhi leh Rahul Gandhi hi promotor leh shareholder zingah an tel.
Central agency hian Prevention of Money Laundering Act (PMLA)-a criminal section hnuaiah Congress hruaitute statement hi an la dawn tih an sawi a, a hmain Congress senior leader Mallikarjun Kharge leh Pawan Bansal-te pawh thu an lo zawt tawh bawk a ni.
Singhvi chuan National Herald hi kum 1942-ah tihchhuah ṭan niin, hetih lai hian India ram awptu British-te khan khap beh tumin an bei nasa a, kha mite thiltih ang bawka tih tumin Modi kaihhruai sorkar chuan central agency, ED chu a rawn hmang ve leh ta a ni, a ti. India-in zalenna a sualna, Freedom Movement-ah BJP chuan tha an thawh ve loh avangin zalenna sualtute an zah lo a, hei vang hian National Herald pawh hi an bitum zel a ni, tiin a sawi.