Kahmiri Pandit-te camp aṭanga an chhuah khapsak

Jammu and Kashmir thuneitute chuan Kashmiri Pandit-te chu nawrh huaihawt an tuma vangin an awmna, transit camp aṭangin an chhuah a khapsak.

Kashmiri Pandit 4,000 vel, Prime Minister special package hnuaia hna thawkte chuan thuneituten hmun him zawkah an camp chu an sawnsak loh chuan Kashmir Valley an chhuahsan tur thu an sawi a ni.

Kulgam district-ah Inrinni khan Hindu school-a zirtirtu hmeichhe pakhat chu school pawn maiah firfiakten an that a ni. Thla hmasa khan Budgam-ah Kashmiri Pandit member Rabul Bhat chu a office chhungah kahhlum a lo ni tawh bawk. Hei vang hian Kashimir Pandit-te hian an tan a him tawh lo nia sawiin, hmun him lamah an awmna sawnsak turin thuneitute an phut.

Kashmiri Pandit-ten nawrh huaihawt an tum vang hian an awmna transit camp chu kharin, camp bulah checkpoint-te chu kharin an chhuah hi an khap a ni. Camp hrang hrangah main gate-te chu an kalh a, hetih lai hian transit camp zinga lian ber, Vesu Pandit colony-ah Kashmiri Pandit eng emaw zat chuan Valley aṭanga sawn phutin lungawi lohna an lantir.

Camp-a sawmte chuan sorkar hnenah an himna tur ngaihtuah sak tura ngen fo chu an ning ve tawh tih an sawi. Kashmir Valley aṭangin Jammu-ah insawn an duh a ni.

Rahul-a'n J&K-a thil thleng chungchangah PM Modi sawisel

Congress party hruaitu Rahul Gandhi chuan tun hnaia Jammu and Kashmir-a inthahna thleng fo chungchangah prime minister Narendra Modi a sawisel.

Rahul Gandhi chuan thla nga liam ta chhungin J&K-ah hian security force 15 leh civil mi 18 thah an ni, tiin BJP chuan central-a an sorkar kum riatna lawm ringawt an buaipui laiin, Kashmiri Pandit-te chuan an tuar mek a ni, a ti. "Hei hi film a ni lo, a taka thil thleng, Kashmir-a thil thleng a ni," tiin hei hi tun hnaia BJP hruaitute, PM Modi pawh tela nasa taka an fak leh an tihlar, kum 1990 chhoa Kashmiri Pandit-te tawrhna tarlanna, 'The Kashmir Files' a tih elna a ni.