Covid-19 hri kai hmuh chhuah thar 28,000 awm

India ramah Covid-19 hripui lengin ziaawm lam a pan hleithei lo a, nimina Ministry of Health and Family Welfare-in report an tihchhuahah chuan hri kai hmuh chhuah thar 28,000 an awm leh a, hri kai hmuh chhuah tam ber ni a thleng leh a ni.

Ram chhung hmun hrang hrangah hri kai 8,49,553 an awm tawh. Hri kai mek 2,92,258 an awm laiin enkawl dam 5,34,621 an awm tawh a, enkawl dam tawh rate hi 62.92% a ni tawh a, hri kai nasa takin pung mah se enkawl dam tawh pawh hi an tam tawh hle. Hri kai mek aiin enkawl dam hi nuai hnih chuangin an tam zawk.

MoHFW chuan report an tihchhuah hma darkar 24 chhungin mi 19,235 chu dama puan an awm tih tarlang laiin 551-in an thihpui ve bawk tih an tarlang a, heti hian Covid-19 vangin India ramah mi 22,674 an thi tawh a ni.

Indian Council of Medical Research (ICMR) chuan nimina report an tihchhuahah darkar 24 chhungin Covid-19 sample 2,80,151 an test tih an tarlang a, hri len ṭantirh aṭanga nimina report an tihchhuah thleng hian sample 1,15,87,153 an test tawh a ni.Covid-19 sample test-na atana laboratory ICMR hi a pawmpui hi ramchhung hmun hrang hrangah 1,194 a awm tawh a, chung zinga 850 chu sorkar laboratory niin private laboratory 344 a awm ve bawk.

Covid-19 vanga India ramin a ram mite hruai haw runpui a kalpui mek, Vande Bharat Mission hnuaiah Inrinni khan ram hrang hrang aṭangin India mi 5,746 an hruai kir. 

Inrinnia hruai kirte hi Sharjah, Bahrain, Muscat, Dubai, Kuala Lumpur, Kiev, Newark, Toronto, Chicago, San Francisco, New York, London, Singapore, Manilla leh Doha-a tangkhangte an ni a, Civil Aviation Minister Hardeep Singh Puri chuan hemi chungchang hi tarlangin Vande Bharat Mission chuan mi tam tak hlimna a thlen a ni, a ti. 

Karnataka sorkar chuan an state khawpui, Bengaluru-ah hri kai an pun belh zel avangin July 14-22 chhung total lockdown a puang a, hemi atana inkaihhruaina chu vawiin hian a tichhuak ang. Inrinni khan Bengaluru-ah hian hri kai hmuh thar mi 1,533 an awm a, ni eng emaw zat chu hri kai hmuh thar hi 1,000 an chuang zel tawh a ni. Bengaluru khawpuia hri kai hmuh tawh hi 16,862 an ni tawh a, an state puma hri kai awm hi 36,216 an tling tawh bawk.