Maha education minister-in HRD leh UGC a sawisel
Maharashtra-a higher education and technical education minister Uday Samant chuan nimin khan Human Resource Development (HRD) leh University Grants Commission (UGC)-in university leh college zirlai exam la hmabak te Covid-19 hri leng kara exam tir an tum avangin a sawisel.
July 6 khan UGC chuan September thla tawp lamah final year zirlai leh semester tawp hmachhawn turte tan exam buatsaih a nih dawn thu a tarlang a, Ministry of Human Resource Development nen ṭangkhawpin exam neih tur chungchanga inkaihhruaina, Standard Operating Procedure (SOP) pawh an tichhuak tawh bawk a ni.
Thla hlui khan Maharashtra sorkar chuan an state chhunga final year leh final semester exam hmabak zirlaite awm dan tur an ngaihtuah hnuah, hri lengin ziaawm lam a pan loh avangin exam buatsaih rih lo turin an state-a university hrang hrangte chu state sorkar chuan a hriattir ta a ni.
Delhi sorkar pawhin sorkar hnuaia university hrang hranga semester leh final year exam tur pawh ṭhulh a nih tur thu a sawi bawk. State dangte pawhin hripui lengin ziaawm lam a la pan lo chunga UGC-in exam neihna tura atana kaihhruaina a tichhuak chu an sawisel a, chief minister ṭhenkhat chuan prime minister Narendra Modi hnenah hemi chungchanga inrawlh tura ngenna pawh an thlen tawh bawk.