Parliament budget session chhunzawm

Parliament budget session neih mek chu thla khat chhung chawlh lailawk a nih hnuin nimin khan chhunzawm a ni a, April 12 thleng session hi neih a ni ang.

Budget session thawh khatna hi January 31 aṭanga February 9 chhung khan neih a ni a, Union budget pawh pharh a ni.

Nimina session chhunzawmah hian eptute chuan US-a India mite beih an nih chungchang an sawi­chhuak a, Union home minister Rajnath Singh chuan he thil hi sorkar laipui chuan an ngai thutak hle tih sawiin, karlehah hemi chungchangah hian thu­chhuah a siam dawn niin a sawi. Lucknow-a Islamic State (IS) firfiak nia hriat kahhlum chungchang pawh National Investigaton Agency (NIA)-in a chhui tur thu a sawi. Tun hnaiah US-ah hian India mi pahnihte chu chibing inhuatna lam hawiin thah an ni.

AIADMK member-te chuan Sri Lanka Navy-te’n Tamil sangha mantute an kah chungchang an sawichhuak bawk a, House laiah chhuak khawmin he thil thleng an duh lohna lantirin an aurual a ni.