Uphaar Case : SC-in Gopal Ansal dilna hnawl

Supreme Court chua kum 1997-a Uphaar-a kangmei chhuak thu­buaia thiam loh chantir, real estate baron Gopal Ansal-a’n bail-a chhuah a dilna chu a hnawlsak.

Justice Ranjan Gogoi, Kurian Joseph leh AK Goel-te awma bench chuan Gopal-a ukil leh senior advocate Ram Jeth­malani-a’n a client chu a kum upat tawh vang te, a natnain a tihbuai nasat avang tein bail phalsak turin dil mah se, an remti lo. Gopal-a u, Sushil Ansal pawh thiam loh chantir ni mah se a kum upat tawh avangin jail-ah dah a ni ve lo.

Gopal chuan a u­naupa ai mahin a tuar nasa tih a sawi a, amah ngei pawh a upat tawh avanga jail-a dah lo tura a ngen thu a sawi. A ukil Jethmalani pawhin Ansal thiam loh chantir a nihna chhan chu a hna ngaihthahah puh a nihna vang a ni a, hremna na ber pekna tur a ni lo, a ti.

February 9 khan court chuan Gopal hi kum khat tan hmabak a la neih chu tlak turin a ti a, nimin kha court-a inpe tura a hun tiam tawpna a ni. Mahse bench chuan March 20-a inpe turin a hriat­tir leh zawk a ni.

Kum 1997-a Uphaar cinema hall-a kangmei chhuakah hian mi 59 an thi a, an zingah hian hmeichhia leh naupang eng emaw zat an tel. Film chhuah laiin kangmei a chhuak a, cinema hall chhungah mi tam tak chu an tang a ni. He chhiatna thleng vang hian cinema hall neitu, Ansal unau hi cinema hall himna lam ngaihthahah puhin thiam loh chantir an ni.