J&K-ah ram chhunga lei­verh thui ber hawng dawn

Ramchhunga lei­verh thui ber, Jammu and Kahsmir-a siam chu tun thla chhung hian hman theih tura hawn a ni dawn. Km 38-a thui, tunnel hi J&K-a Chenani leh Nahsir inkara siam a ni a, ‘Tunnel of Hope’ tia sawi a ni.

Tunnel siam hna hi kum 2011, May thla khan ṭan a ni a, Congress vice-president Rahul Gandhi-a’n lungphum a phum a ni. He leiverh hi kum­in August thla zawh hman tura ruahman a ni a, ruahman lawk aiin an zo hma thei dawn a ni. Chenani-Nashri inkara leiverh siam hi meter 9.3-a zau a ni a, khawpui pahnih inkalpawhna atan hian darkar 10-11 vel hun hman a ngai ṭhin a, leiverh hi hman a nih hunah chuan kalkawng hi km 50 velin a tawi phah dawn a ni.

Road Transport and Highways ministry chuan Prime Minister Narendra Modi chu leiverh hawng tur hian sawm a ni dawn tih a sawi. Hemi atana inbuatsaihna te thlirin, J&K police officer-te pawhin a hmuna venhimna kalpui dan turte pawh an thlithlai tawh a ni.