SC-in Calcutta HC judge manna tur thupek tichhuak
Supreme Court chuan Supreme court leh High Court-a judge aṭanglai leh chawl tawhte chungchang sawiselna lehkha, Prime Minister, Law Minister leh Supreme Court Registrar hnena thawntu, Calcutta High Court judge CS Karnan manna tur thupek, bailable warrant chu nimin khan a tichhuak.
Supreme Court chuan judge CS Karnan hi court-a inlan tura thupek a zawm duh loh vangin manna thupek hi a tichhuak a ni.
Chief Justice Jagdish Singh Khehar kaihhruai, judge pasarih awmna constitution bench chuan Justice Karnan chu Rs 10,000 dahkham tur leh, March 31-a court-a inlan turin a hriattir bawk. SC chuan West Bengal DGP chu Justice Karnan manna thupek tihchhuah chu kengkawh turin a hriattir bawk.
February 8 khan Supreme Court chuan Justice Karnan hi February 13-a inlan turin a ko a, mahse a inlan duh lo a ni.
PM, Law Minister leh Supreme Court Registrar hnenah lehkha a thawnah, Justice Karnan chuan Supreme Court leh High Court judge-te chu eiruknaa inhnamhnawih leh chi inthliarna lam kalpuiah a puh a, court collegium-in Madras High Court aṭanga Calcutta High Court-a a sawnna pawh a stay bawk.
Justice Karnan chuan Supreme Court-in manna thupek a tihchhuah chu amah tihchhiat tumna a ni tih sawiin, judge pasarih-te rorel dan chu CBI director chhui tir turin thupek a siam ve bawk. Karnan chuan President hnenah lehkha thawnin, SC-in manna thupek a tihchhuah chu suttir turin a ti.