VC laka che mawi lo JNU zirlaite thubuai siamsak

Delhi Police-te chuan Jawaharlal Nehru University (JNU) zirlai eng emaw zat chu Vice Chancellor Jagadesh Kumar-a lakah, meeting neih laia mawi lo taka cheah puhin thubuai an siamsak.

Police-te chuan JNU thuneitu lamin Vasant North Police station-a complaint an thehluh hnuah, Nilaini khan zirlai 10 chuang lakah thubuai hi ziahluh a ni tih an sawi.

Additional Deputy Commissioner of Police Chinmoy Biswal chuan, “March 4 khan JNU registrar chuan complaint a thehlut a, February 27-a zirlaiten hnathawktu an dan an tihtawp hnuah, VC leh staff member dangte chu administration block-ah hnathawk turin an lut a, hemi hnu hian zirlaite chuan VC hmuh phut hian administration block hi an luhkhung ve leh a ni”, a ti.

Zirlaiten hmuh an tum lai hian VC hi a nuamsam lo a, Rector 1 office-ah awmin doctor pawh koh a nih thu complaint-ah hian tarlan a ni. Mahse zirlaite hian a tuk lamah pawh VC hmuh ngei tum hian an nawr lui a, zirlai hmeichhe pakhat chuan VC hian a hmu duh lo a nih chuan intihhlum a tum thu pawh a sawi niin, Biswal chuan a tarlang. VC leh zirlaiten meeting an neih hnu hian, zirlaite hi VC chungah an che mawi lo hle nia sawi a ni.