Covid-19 vaccine : Sorkarin door-to-door campaign kalpui

Rampuma Covid-19 vaccine pek hna kalpui mekah, state ṭhenkhata vaccine pek chhuah kawngah an vuaicha sawt hle. Hei vang hian sorkar laipui chuan vaccine pek hna chak zawka kalpuina tura thla hnih chhung door-to-door campaign a kalpui tur chu Nilaini khan a hawng.

Tan-in, tar enkawlna hmun, ashram, madrasa leh day-care centre-ahte door-to-door campaign, 'Har Ghar Dastak 2.0' hi June 1-July 31 chhung kalpui a ni dawn. Hemi chhung hian kum upa zawk, senior citizen leh naupangte thlur bik an ni ang.

Vaccine dose thumna, precaution dose pek chhuah mekah senior citizen, tar enkawlna in leh ashram-ahte he campaign hi ngawrh taka kalpui a ni ang. Kum 60 chunglam hnena precaution dose pek mekah mi vaibelchhe 1.90 te pek a ni tawh niin union health ministry data chuan a tarlang. Kum 60 chunglam hnenah precaution dose hi a thlawna pek a ni.

Official-te sawi danin, kum 12 chin hnena vaccine pek chhuah hi a muangchang hle niin an sawi a, kum 12-14 inkar zingah Covid-19 vaccine dose khatna hi mi vaibelchhe 3.40 hnenah pek a ni tawh a, dose hnihna hi mi vaibelchhe 1.65 chauh pek an la ni. Kum 15-18 inkar zingah vaccine dose khatna hi mi vaibelchhe ruk dawn pek an ni tawh bawk.

Door-to-door campaign neih chhung hian sorkar, private leh informal school leh day-care-te kal kual a ni dawn a, school kal lo naupangte pawh a tam thei ang ber vaccine hi pek tum a ni.

Ram pumah Covid-19 vaccine hi dose vaibelchhe 193.57 pek a ni tawh. Kum 15 chung lam zingah vaccine dose khatna la hi 96.3% awm tawhin, a dose hniha la hi 86.3% an awm tawh bawk.